परिस्थिती गंभीर, बाप खंबीर; लेकीचा सासरी छळ, वडिलांनी वाजतगाजत माहेरी आणलं; वरातीची चर्चा
सासरच्यांकडून लेकीचा छळ होत असल्यानं वडिलांनी तिला वाजतगाजत माहेरी आणलं. लेकीची त्रासातून सुटका झाल्याचा आनंद त्यांनी बँडबाजा वाजवून साजरा केला. या वरातीची सध्या सर्वत्र चर्चा होतेय.

Authored By कुणाल गवाणकर | महाराष्ट्र टाइम्स.कॉम | Updated: 18 Oct 2023, 2:27 pm
Follow
रांची: रांचीमध्ये निघालेल्या एका वरातीची सध्या सर्वत्र चर्चा आहे. सासरी निघालेल्या लेकीसाठी नव्हे, तर सासरी छळ होत असलेल्या लेकीला माहेरी आणण्यासाठी एका बापानं वरात काढली. सासरच्यांच्या जाचापासून लेकीची सुटका करण्यासाठी बापानं तिला वाजतगाजत घरी आणलं. वरातीमध्ये बँडबाजा होता. आतषबाजी करण्यात आली.
father daughter

१५ ऑक्टोबरला काढण्यात आलेल्या वरातीचा व्हिडीओ वडिलांनी सोमवारी त्यांच्या फेसबुक अकाऊंटवरुन शेअर केला. 'मोठी स्वप्नं डोळ्यांत घेऊन आपण लेकींची लग्नं लावतो. पण जेव्हा त्यांचा जोडीदार, कुटुंब वाईट निघतात, त्यांना चांगली वागणूक देत नाहीत, तेव्हा आपल्या मुलींचा सन्मान राखण्यासाठी त्यांना पुन्हा घरी आणायला हवं. कारण लेकी अनमोल असतात,' असं प्रेम गुप्ता यांनी फेसबुक पोस्टमध्ये म्हटलं आहे.

ट्रक पेटल्यानं मृत पावलेला माजी नौदल कर्मचारी २० वर्षांनंतर जिवंत; ३ खुनांचं गूढ उकललं
झारखंडच्या रांचीमधील कैलाश नगरमधील कुम्हारटोली परिसरात राहणाऱ्या प्रेम गुप्ता यांनी त्यांची लेक साक्षीचा विवाह वर्षभरापूर्वी धुमधडाक्यात लावून दिला. झारखंड वीज वितरण विभागात सहायक अभियंता असलेल्या सचिन कुमारसोबत २८ एप्रिल २०२२ रोजी साक्षीचं लग्न झालं. सचिन रांचीच्या सर्वेश्वरी परिसरात राहतो. लग्नानंतर काही दिवसांनीच सासरच्यांनी साक्षीला त्रास देण्यास सुरुवात केल्याचा आरोप प्रेम गुप्ता यांनी केला.
सचिन अनेकदा साक्षीला घराबाहेर काढायचा. सचिनची आधी दोन लग्नं झाली असल्याचं साक्षीला समजलं. त्यानंतर तिच्या पायाखालची जमीन सरकली. यानंतरही साक्षीनं नातं वाचवण्याचा प्रयत्न केला. पण शोषण आणि जाचामुळे तिला सासरी राहणं अवघड जाऊ लागलं. त्यामुळे तिनं या नात्यातून बाहेर पडण्याचा, सासर सोडण्याचा निर्णय घेतला.

मजुराच्या खात्यात आले तब्बल २२१ कोटी, ITनं नोटिस पाठवली; मग ४ वर्षांपूर्वीची घटना आठवली
साक्षीच्या निर्णयाला तिच्या कुटुंबियांनादेखील खंबीरपणे साथ दिली. वडील आणि माहेरच्या मंडळींनी वरात काढत तिला वाजतगाजत घरी परत आणलं. लेकीची जाचातून मुक्तता झाली. त्याचा आनंद साजरा करण्यासाठी वरात काढल्याचं प्रेम गुप्ता यांनी सांगितलं. साक्षीनं घटस्फोटासाठी न्यायालयात अर्ज केला आहे. मुलानं तिला पोटगी देण्याची तयारी दर्शवली. त्यामुळे लवकरच घटस्फोटावर शिक्कामोर्तब होण्याची शक्यता आहे.